Mayung atau Habar Tumon Mongondow

 Chairun: Kebudayaan Tua Kain Mogoguyang Galumudan

Editor: Erwin Ch Makalunsenge

Peliput: Lp

Terimakasih banyak kepada senior saya Erwin Ch Makalusenge  yang bersedia untuk melakukan editing pada sebuah tulisan ini kecil dan sederhana ini. 

Mayung tua  in mangalenya  in kabar atau berita. Pangkoyon in o’uman in naton tantu molibo pa kita komintan, mongo’onu in pinomangkoyan monik sinangoyan kebudayaan . Kebudayaan aka tumon mongondow, kain mogoguyang galumudan.  Galumudan na’a in kontua’ta pinodondonan in barongan in  onda  nobiag tanob kon tudu in  buta na’a, kon tua’ta dagat,  na’a kon toba, bo kon tulungaya, nodoyon pabi nobali tongo galumudan.

“Tongo galumudan, diya pabi onda kita mota’aw mopoyo irak onda kainia kain in kebudayaan, onda kain adat, onda in kesenian, nodondon pabi komintan kontua, aka tonga pinoduduy  in o’uman, guyanga naton doday’in tua,” tua in o’uman i Chairun Mokoginta SE kon  Kamis (18/12) kolabung, kon baloinya.

Kai Chairun, takolipod aka mongonu ka’don,  mayaka monalun, andeka  mogibol, maya mo dapul, andeka mongonu ka don,  komintan pabi molibo ko’i togi tatua, na agat  in monilon, monoimama bo moigum bi’koi togi,  bo dodiya in gama naton mongondow kon kayuon oyuon bi kitogi bo oyuon nolukad.

“Tuata manangka’in monoimama kimonia andeka monilon, moigum koitogi tatua’ta nolukad kon kayuon, aka poduduy kon sinumi may  tanaaya,  takoina galumudan in mulai don pinopoyo irak-irak mangoy monia nobali bidon tangoynya kebudayaan bo na’a tangoynya in adat,” guman i Chairun.

Pinoguman bui i Chairun, mota’aw bi naton indean kon kayuon kita in diya anda ogoy momalu dika momalu sin pitoron lukad in kayu’on tana’a, yo ki’ine kadon maya kayuon diya pabi mota’aw mosinggog mori ropot mako lontu’nya mokokow.

“Noyoramban tatua ta O’uman kita naaya adat, sinangoyan don kai monia na’a, in adat sindoday tua ta in galumundan na’aya noyo bauk pabi’ dodia naton intaw takin tanaa, kaimonia bobiagon takin  kainia tompot, langit, gotup barongan don in tanob kon dunia na’a, Noyogalum pabi sia diya pabi noyoira-irak,”  tua in o’umannya.

Nomangkoy nokon tua ta, kai Chairun, bo tana’aya don, oyoun don kaimonia pinoyo duduy don ilmu pengetahuan, bo pinoirak don takin kebudayaan,  bo onda in tana’aya adat don, tolimbawaanya kon takoina dodia naton kon kayuwon bo kon lipu, aka momalu pitoron in yampoy. Aka kon lipu kaimonia momalu yo kotugatan tompuyu adat.

“Tua ta in manangka mota’aw naton poindean na’anta bo kolipod notongkay bi dodia naton intaw. Sin, nobiag bi’ noyotakin in bobiagon in kayuwon notobatu pabi komintan. Sin kita na’a intaw in molibo pabi koi togi ta nolukad kon tua, yo aka sinumi may na’a in diya don onda aka kolipod diya bi’ anda natua,” kain Budayawan Bolaang Mongondow tua.

Tolutunya kita don kon Bolaang Mongondow na’a in monaidi onda don mako in sinalaan mogoguyang doday tua, ta ko’inaton komintan, sin aka diya yo kitapa doman komintan,  yo ki’ine pabi molukad kon sinalaan mogoguyang koi naton.